दूरदर्शनच्या पंधराव्या नवरत्न पुरस्कारांची घोषणा
यंदा लेखिका डॉ.विजया राजाध्यक्ष यांना साहित्यरत्न, गायक रामदास कामत यांना नाट्यरत्न, संगीतकार अजय-अतुल यांना संगीतरत्न, अभिनेता नाना पाटेकर यांना चित्ररत्न, शिक्षण तज्ञ डॉ. विजया वाड यांना शिक्षणरत्न, ज्येष्ठ पत्रकार राधाकृष्ण नार्वेकर यांना रत्नदर्पण, उद्योजक अनिल जैन यांना वैभवरत्न, सेवाभावी कार्यकर्ते विजय फळणीकर यांना सेवारत्न तर सुलेखनकार अच्युत पालव यांना कलारत्न पुरस्कार जाहीर झाला आहे. याशिवाय अभिनय क्षेत्रातील पदार्पणासाठी अभिनेत्री प्रार्थना बेहेरे यांना फेस ऑफ द ईयर पुरस्कार घोषित झाला आहे.
सन्मानचिन्ह आणि प्रमाणपत्र असे या पुरस्काराचे स्वरुप आहे. यंदाच्या पुरस्कार निवड समितीमध्ये गिरीजा काटदरे, विजय कलंत्री, विक्रम गोखले आणि दिनकर रायकर या मान्यवरांचा समावेश होता. यंदाचा सह्याद्री नवरत्न पुरस्कार वितरण समारंभ उद्या संध्याकाळी 6 वाजता रविंद्र नाट्यमंदिर येथे संपन्न होणार आहे. या पुरस्कार सोहळ्याचे प्रसारण मुंबई दूरदर्शन केंद्राच्या सह्याद्री वाहिनीवर 29 मे रोजी संध्याकाळी 4.30 वाजता करण्यात येणार आहे.